Fugla- og náttúruverndarfélag Álftaness var stofnað 23. október 2002, á kynningarfundi um fuglalíf á Álftanesi. Á fyrsta aðalfund félagsins, 20. maí 2004, voru stofnfélagarnir 34.

Markmið félagsins er að vekja athygli á því sem Álftanes hefur upp á að bjóða til útivistar og fuglaskoðunar og stuðla að búsvæðaverndun á nesinu. Félagið stendur því fyrir skoðunarferðum, fræðsluerindum og annarri kynningarstarfsemi. Jafnframt er áformað að koma upp fuglaskoðunarskýlum og upplýsingatöflum á völdum stöðum, til að koma til móts við gesti og gangandi. Fuglaskoðunarskýli hafa víða reynst vinsælir viðkomustaðir og áningastaðir útivistarfólks. Þau má nota bæði til að auðvelda fólki að fylgjast með fuglum og vera áningarstaður og skjól fyrir göngufólk.

Fjölbreyttu fuglalífi á Álftanesi verður vitanlega ekki viðhaldið nema með verndun hentugra búsvæða. Því er ærin ástæða til að velja og afmarka svæði með það að markmiði að vernda líffræðilegan fjölbreytileika á nesinu og spilla ekki þeirri sérstöðu sem nesið hefur upp á að bjóða á höfuðborgarsvæðinu, bæði hvað varaðar náttúru og söguminjar. Kynning á því sem vert er að vernda stuðlar að virðingu og viðeigandi umgengni. Velja þarf svæðin af kostgæfni og sjá til þess að framkvæmdir á nærliggjandi svæðum skemmi hvorki fyrir fuglalífi né útsýni. Hvað þessi mál varðar má frá undanförnum árum finna dæmi um hvorutveggja, fyrirhyggju og hugsunarleysi eða áhugaleysi. Enn er þó hægt að státa af nær ósnertri fjöru, tjörnum sem tengjast opnum óbyggðum svæðum og votlendisblettum sem henta vel sem varplönd. Fara þarf vel með þessi gæði, en jafnframt færa sér þau í nyt með t.d. náttúruskoðun undir leiðsögn.

Sjóvarnargarðar meðfram endilangri vesturströndinni eru dæmi um aðgerðir sem orka tvímælis. Upphlaðnir garðarnir hafa spillt eftirsóttum sjávartjörnum og byrgja sýn út á flóann, en eru jafnframt nauðsynleg vörn gegn landbroti. Önnur dæmi um mótun náttúrunnar á Álftanesi eru skurðirnir sem bændur grófu þvers og kruss til að þurrka upp mýrarnar og rækta tún. Nú þegar búskapur hefur verið aflagður má oft heyra óskir um að þessir skurðir verði fylltir á ný af öryggisástæðum, enda flestir vanhirtir og fullir af eðju. En þá vakna spurningar um hvernig vatnsbúskapinn á nesinu myndi breytast ef skurðir yrðu fylltir og yfirborðsvatn annað hvort leitt í burt í rörum eða leyft að safnast upp þegar afrennsli hefur verið heft. Grunnvatnsstaðan hefur áhrif á rúmmál jarðvegsins og breytir gróðursamfélögum. Fleiri aðgerðir hafa haft veruleg áhrif á gróðurinn, t.d. hækkun lands og jarðvegsskipti. Ástæða er til að huga rækilega að slíkum þáttum áður en ráðist er í framkvæmdir, með verndun líffræðilegs fjölbreytileika á Álftanesi í huga. Samkvæmt aðaskipulagi er ætlunin að halda í sjó- og mýrartjarnir, varplönd fugla og fjörur, sem einkenna nesið, og þá er mikils vert að láta náttúruna njóta vafans á meðan hugsanleg áhrif framkvæmda á lífríkið eru skoðuð og vandlega metin.
Sveitastjórnendur hafa þegar markað brautina. Á nokkrum viðeigandi stöðum hafa verið sett upp fræðsluskilt,i gestum og gangandi til fróðleiks og ánægju. Félagið vill stuðla að því að þessi slóð verði fetuð áfram og sérstaða sveitarfélagsins á höfuðborgarsvæðinu undirstrikuð.

Fugla- og náttúruverndarfélag Álftaness er vettvangur áhugafólks til að viðhalda og njóta þeirra gæða sem náttúra og menning Álftaness býður upp á.